Pourmenée su Acignë : les traces du pâssë den le bourg
Pourmenée su Acignë : les traces du pâssë den le bourg
Ene p’ite pourmenée den l’istouere d’Acignë, a sieudr petit a la fai de votr chemine en mirant su votr telefone de pouchette (tournë par Thierry Besnard, Touène Aghesse).
Quelques précisions orthographiques et phonétiques: ë se prononce eu (ex Acignë); ll se prononce comme un i ou un y (ex pllacis, place en français); ao se prononce ow (ex l’iao, l’eau en français).
Este ghidane enraye ao devant de la mérerie, ao cartier des Clouères.
Le tour du mitan du bourg. Arot’ous dede la mérerie, sieuvéz les flleches.
Pllacis de la mérerie. Come q’ele ét perchaine du bouéz, Acignë taet eune vile de menuziérs, de sayous e de marchands de bouéz qi bezognaent hardi. Su le devant de la nouvele mérerie, bâtie depés l’anée 1989, la cherpente en bouéz ét ilë en souvenance du temp-la. Su drete, l’anciene mérerie e l’ecole côte-côte furent chomées en 1892.
Aghettéz don les afilées d’ôtës a bâsse soulaire du pllacis.
Un cartier d’aotrfai de fètissiérs é de payizans. En peut s’avizer du coupl de chapiteriaos a tracerlesafilées d’ôtës és Clouères.Ça taet des muces pourles chartes e les bestiaos.
Pâsséz dessour le chapitrè du petit marchë, viréz a gaoche pés a drete, e devaléz olva la veyette diq’és courtis és familles.
Par derre les ôtës e les lojis, n-i a le vert. Olva, le va de la Vilaine ét nayant, ça q’ét don eune aïre-nijot naturale eyousq’en ne peut ghere bâti de cai.
Poursieuvéz la devalée.
Den la coulée, n-i a des courtis, des bouéz, des maraes e des verjérs.
Olva la sente, v’aléz pouvair poursieudr un petit cai su gaoche (devers le soulaire) e terouer blao la nature a l’entrée du bourg.
Courtis de familles. Les pieces qemunes ilë sont afermées a du monde qi mettent de la leghume a cretr.
Poursieuvéz su la sente e v’aléz terouer des verjérs de pomiérs.
Verjérs de la qemune. Les prées-la ont të pllantées o des pomiérs a citr e a pomes de garde. Acignë e tout le departement d’Ile-e-Vilaine de bout en bout taet des fameûz fezous de citr diq’és anées 1950. En pouvaet i vaer un 235 d’orines de pomiérs. Les verjérs de la qemune-la mettent en biao de garder des orines des pomes, qe lous noms sont ensegnës su des ardouézes amarées su les piës. Ao fond, le marae ét ben des fais nayë sous l’iao en ivè.
Est’endret patouillouz, le marae de la Mote, loje des pllantes e des bétes gardées come le liron d’iao (son corp aperchant un 20 cm de long e sa coue n-en mezurant eune dozaïne).
Refouqéz e ressieuvéz la sente dret-bout devers le soulaire. Reterouéz le vilaije par la vae és Roches den le bâs du bourg.
La vae és Roches. Les petites couézées o des beudons entourées de bouéz (ilë a gaoche) taent ben des fais les sienes des petit taits. L’ôtë un petit cai pus lein, o l’us en arc de biscouin, ao limerot 8, ét la siene a un ancien tanou. La taneriet taet eune fètisserie vrae conseqente su Acignë diq’ao 18e siecl.
Ao pië de l’igllèze mucéz den les degrës a gaoche a devaler devers les moulins.
La muce en degrës ét ao bâs de la murâille su gaoche. La murâille-la taet ilë a acoter le cemeterre qi cernaillaet l’anciene igllèze. L’igllèze d’astoure fut levée en 1904 e le cemeterre bougie don d’endret.
Devaléz les degrës.
Vûe d’Acignë (cadr de 1814). Este vûe dedepés l’aotr bord ét nette ressembllante. Su drete, le coupl de moulins furent rempllacës par des bâtiments pus frés-féts, meins su la méme pllace tenant. Den le mitan, en dessour la vaille iglléze, la cour des moulins taet eune rive qi devalaet diq’a la riviere. Le pont du temp-la, ren q’en bouéz, pâssaet entere le pont d’anet e les moulins, esti-ci deboulaet den la cour des moulins, just par devant l’ôtë q’ét terjou chomë és jous d’anet.
Les merqes du vieu pont. Cant c’ét qe le livè de la Vilaine n’ét pouint haot de trop, en peut vaer den son aojeu un coupl de roches de fondement du vieu pont. Les roches de maçone sont core ben veyabl dessur l’aotr berne, e servent de muzouer a l’ôtelle . I fut rempllacë par le nouviao pont en 1889.
Ramontéz la vae Saint-Jelien.
Ça taet par la vae Saint-Jelien q’en aboutaet ao vieu pont. Ao limerot 4, ça taet l’ôtë ao chapelain d’un vieu ôpita qi fut aboli ao 16e siecl. Il taet just en pllace de la belle demeurance du 19e siecl q’en peut vaer pus haot su la vae, su gaoche.
Olmont la vae Saint-Jelien, nous vela rendus den la vae du Pont Neu, cete-la tout come son nom fét mencion, mene dret ao nouviao pont bâti a la fin du 19e siecl.
Permiere demeurance ao segneur d’Acignë. Faot s’enjiner den l’enrai de la fieudaotë ao 11e siecl. Le permier segneur se taet etablli ilë, a l’amain de l’igllèze e du cimeterre a sour fin de la dirijer, e de la rote qi traçaet la parouesse. Ben pu tard, les segneurs minrent a lever un aotr châtè, su soulaire du vilaije, perchain de la tenûe de la Mote d’astoure qe son nom s’orine den la mote fieudale-la. I ne demeure ren qe de rales merqes du segond chatè-la e de ses lojes.
Viréz a drete devers l’igllèze.
La vaille igllèze du bout du 19e siecl. N-i a pus ghere qe l’ôtë a colombaije su drete a y-étr chomë core. La nouvele iglléze fut levée en pllace de l’anciene. L’afilée d’ôtës den le mitan fut abolie pour etablli eune muce pu larje pour la rote.
Ramontéz pâs a pâs olmont la vae Saint-Leouiz..
Entrées den les caves e les celiérs. V’aléz vaer den l’bourg hardi d’entrées de méme sorte, qi talent devancées d’aotrfai par des degrës. En i dehuchaet les bâriqées de citr, la baisson qe le monde emaent le mieuz.
L’ôtë du 16e siecl depés le pllacis des cohues. O ses colombaijes, l’ôtë-la ét le pus vieu des ôtës du bourg.
La nouvele iglléze. Le biao cllocher ajourë tire son idée den les igllézes du Finistere, a l’aotr bout de la Bertègn. Come qe les segneurs d’Acignë e le rouai de France ont souvente fais të aliës, le monde d’Acignë avaent grôs d’ergardance en Saint-Leouiz. La vae ét nomée d’aprés li e la jou de Saint-Leouiz taet la féte la pus conseqente du payiz.
Poursieuvéz olmont la vae.
La vae de Calaes. Ele ét la metr-vae du bourg. L’amain su gaoche de la vae n’a pouint ghere chanjë, biao qe les bâtiments de l’amain su drete furent anouviaozis nette long les dâraines anées. Les ôtës ao fond furent abolis etout pour aféter le pllacis des Clloueres e de la mérerie.
Ramontéz la vae de Calaes.
Den l’ôtelle Le Qu’Âtre, n-i a un fouyer qi fut fét en 1574. Les entrées maitië enrochées menaent dret és celiérs e, ben manqe, a des ouvroueres de tessiérs etout. Pour este fezerie, n-i avaet afére qe l’ére seraet mucr tenant.
Vous vela rendus d’ertour ao pouint d’enrai, perchain de la mérerie.
Pourmenée su Acignë : les traces du pâssë den le bourg
Nous utilisons des cookies pour vous garantir la meilleure expérience sur notre site. Si vous continuez à utiliser ce dernier, nous considérerons que vous acceptez l'utilisation des cookies.Ok
